دڵ دەناڵێ دەم بەدەم سووتاوی تاوی فیرقەتە
بولبولە بۆ ڕوویی گوڵ دڵ پڕ لە داخ و حەسرەتە
چاو پڕ ئاو و سینە پڕ ئاور، دڵ بە دولبەر چاوەڕێ
ئەی خودا دەردی جودایی چەند گران و زەحمەتە
ڕۆح لەسەر لێو چاوەڕێتم ئەی تەجەللای نووری توور
هێندە جارێک خۆت بە دڵ بنوێنە، مەرگم حەسرەتە
ڕەمز و غەمزەی یەک نیگاهت قەلبی کون کون کردووم
بوومە جێی دەسڕێژی تورکان؛ بۆیە جەرگم لەت لەتە!
داغداری ئەلفی باڵات با لە ڕووت مەحرووم نەبێ
من کەفیلی وەسڵی جەننەت هەرچی ئەهلی وەحدەتە
چاوی یارم کوشتمی، جەزبەی بە ناز هێنامیەوە
سەد کە بیمار و نەخۆش بم، پێکەنینی شەربەتە
با حیجابێکم نەمێنێ لادە تاری زولفەکان
تا بەکەی دڵ نامورادی وەحدەتە لەو کەسرەتە
گوڵ بە دەم بادی سەباوە پێکەنی، خۆش بوو جیهان؟
یا لە تەئسیری هەناسەم ئەتری بەرقی خەندەتە؟
من پەرێشانم لەبەر زولفت بە ڕوودا کەوتووم
زولف و ڕووی تۆ سونبول و گوڵ، یا کە نوور و زوڵمەتە؟
ئەو گوڵەی شەیدا دڵی کردووم بە لێوی شەککەرین
عەنبەرین موو، نەستەرەن بۆ، لالە ڕوو، مەه جەبهەتە
مردم و نەمزانی ئەو ئاورەی منی سووتاند چ بوو
حاسڵی سەیر و سلووکی عاشقان هەر حەیرەتە
مردم و هەرگیز نەگەیمە قیبلەیی تاقی برۆت
ئاخر ئەی قیبلەی مرادان تا بەکەی ئەم عەزیەتە
یار ئەوا بەیعی ویساڵی ڕووی لەگەڵ تۆ کردووە
جەننەتی داوە بە ڕۆح، نامەرد وەفایی فورسەتە